الأربعاء، 16 نوفمبر، 2016

تجربتي في الحصول علي 6.5 من خلال التعلم الذاتي،

((بناء علي تساؤلات العديد من الأصدقاء، أنقل لكم تجربتي في الحصول علي شهادة "أيلتس IELTS" عن طريق التعلم الذاتي))))
البوست طويل بس فيه معلومات مهمة جداً و خبرة السنين :), و أرجوا عمل "مشاركة Share" لتعم الفائدة:
الطريقة اللي انا هقولها دي هي الطريقة اللي انا مشيت عليها لغاية مجبت 6.5 في الايلتس بدون معلم.
مهم جدا جدا مصدر الجروب التالى على فيسبوك يحتوى على أكثر ن 100 تجربة ناجحة لاجتياز اختبارات الأيلتس IELTS والتوفل TOEFL والـ PTE Academic بنجاح 
صورة من الشهادة الخاصة بى ايلتس IELTS 

أولاً: ايه هي شهادة IELTS ؟
هي أكثر شهادة معترف بها في العالم لتحديد مستوي اللفة الإنجليزية، يعني لو جيت تقدم علي أي دراسة في الخارج، بكالوريوس أو ماجستير أو دكتوراه، هتلاقي الحصول علي الشهادة دي مطلب أساسي للقبول. و كمان بتكون شرط اساسي عند التقديم لجميع المنح الدراسية، و العمل في الخارج. يعني من الآخر هي أول خطوة علي طريق الدراسة و العمل و المنح الدراسية بالخارج، الاختبار بيقيس مهارات اللغة الاربعة وهي الاستماع، الكتابة، القراءة، التحدث.
ثانياً: ايه الدرجة المطلوبة؟
الدرجة الكلية للألتس هي 9 و الحصول علي درجة 5.5 فيما فوق بيكون كويس و لكن لو جبت 6.5 أو 7 يبقي هتقبل تقريباً في كل الجامعات و المنح.
ثالثاً: الامتحان بيتعمل فين و بكام؟
الامتحان بيتعمل في المجلس الثقافي البريطاني British Council و مقره الأساسي في العجوزة بالجيزة، و لكن توجد أماكن عديدة للإختبار علي مستوي الجمهورية، و يتم حجز موعد و مكان الإختبار عن طريق موقع المجلس الثقافي البريطاني و هو: https://ielts.britishcouncil.org/
و سعر الإختبار في الوقت الحالي 1350 جنيه.
رابعاً: هل يحتاج الإختبار إلي مستوي معين في اللغة الإنجليزية و ايه هيا الطريقة التقليدية للوصول للمستوي المطلوب؟
نعم، الاختبار بيحتاج مستوي عالي في اتقان اللغة، و الطريقة التقليدية هي انك بتعمل تحديد مستوي في ال British Council و بعدين بتدأ دراسة المستويات اللي بعد مستواك، و اجمالي المستويات 25 مستوي، و بعد كده بتحتاج دخول كورس اعداد للايلتس علشان تبقي جاهز للاختبار، و طبعاً العملية دي بتاخد وقت و مجهود و فلوس كتيييييير.
خامساً: ازاي اقدر اختبر الايلتس و اتعلم اللغة بالتعليم الذاتي؟
انا لما بدأت رحلتي مع تعلم اللغة جربت تقريباً معظم المراكز الشهيرة في تعليم اللغة، و لكن مكنتش بكمل دايماً، لان المكان كان بعيد و الفلوس كتير و الاستفادة قليلة جداً و التقدم بطيء، و بعد فترة قررت ان اتعلم اللغة لوحدي في البيت و فعلاً بدأت رحلة التعلم الذاتي، و علشان مطولش عليكو، لازم تمر بالمراحل دي علشان تتعلم لوحدك:
# المرحلة الأولي: (تعلم اللغة بشكل عام):
و ده هيكون عن طريق الموقع التالي: http://www.learnamericanenglishonline.com/
الموقع ده رائع في تعلم اللغة العامة، و يقوم عليه مدرس أمريكي، و هو مقسم الي مجموعة من المستويات، كل مستوي بلون معين، بيبدأ معاك من تحت الصفر، و متقلقش ان الموقع كله بالانجليزي، لان المدرس بيتعامل معاك كانك طفل صغير لسة بيتعلم الكلام، و معتقدش ان الطفل الصغير بيكون محتاج معرفة لغة معينة قبل تعلم الكلام!
هتخلص كل المستويات اللي في الموقع ده، حسب استيعابك. و بردو في المرحلة دي هتبدأ حفظ الكلمات الشائعة عن طريق القاموس التالي: https://vk.com/doc77569995_161100524?hash=4d2632384dcfae38f9
و هو قاموس مصور لا يحتوي علي ترجمة عربية، بمعني انك بتشوف الصورة و تلاقي الكلمة جنبها، و دي افضل طريقة للحفظ، لان طريقة كتب المدرسة غلط و هي انك تحفظ الكلمة بالانجليزي و جنبها الكلمة العربي.
حاول تنسي العربي خااااالص و متشوفهوش قدامك ابداً اثناء تعلم الانجليزي.
# المرحلة الثانية: (مرحلة التدريب علي الإستماع):
طبعاً موضوع الاستماع ده بيمثل شبح بالنسبة لناس كتير، بس احب اطمنكوا الموضوع لو اتعمل صح صدقوني هيبقي سهل جداً و هتتفاجيء بتقد مستواك في الاستماع، ببساطة هتدخل علي قناة ناشيونال جيوجرافيك علي اليوتيوب و هي علي الرابط التالي: https://www.youtube.com/user/NationalGeographic/videos
القناة عليه مجموعة كبيرة جداً من الفيديوهات في مجالات مختلفة، اللي بيميز القناة دي ان اللغة المستخدمة هي لغة واضحة و رسمية، بالاضافة الي وجود تفريغ للكلام باللغة الانجليزية، اللي انت هتعمله انك هتشغل الفيديو، و بعدين هتشغل الترجمة الانجليزية من زرار CC الموجود أسفل الفيديو، هتلاقي كل الكلام اللي بيتقال مكتوب في الترجمة، يعني هتقدر تسمع و تقرا في نفس الوقت و رؤية للمشاهد هيزيد من فهمك، و بالطريقة دي هتشغل الذاكرة البصرية و السمعية في وقت واحد، هتلاحظ ان في كلام انت سامعه و مش فاهمه بس لما تقراه ممكن تفهمه، و لو لقيت كلمة انت مش عارفها حتي بعد مقريتها، وقف الفيديو و ترجمها في جوجل و اسمعها، و بعدين كمل الفيديو، و بعد ما تخلص الفيلم و تفهم كل الكلام شغله تاني بدون ترجمة و شوف النتيجة.
الموضوع ده فعال جداً في تطوير الاستماع، و ممكن تجيب اغاني انجليزية و تعرف كلماتها Lyrics، بس دي مرحلة متقدمة شوية لان الكلام بيكون عامي.
حاول تتابع كذا برنامج انجليزي، او مسلسل، خلي يومك كله انجليزي بقدر الامكان.
# المرحلة الثالثة: (مرحلة التحدث):
اولا عكس ما هو متعارف عليه، مش لازم تعمل محادثة مع حد اجنبي و لا مع حد اصلاً، انت ممكن تقوم بدور المتحدث و المتحدث اليه لوحدك، و انت اصلا بعد اتقانك للمرحلتين اللي قبل كده هتلاقي الموضوع سهل جدا انك تعبر عن نفسك بالكلام، و علي فكرة اللهجة مش مهمة قوي في الايلتس و لكن الاهم هو النطق الصحيح للكلمات.
# المرحلة الرابعة و الأهم (الإعداد للاختبار):
ارجو العلم بان تعلم اللغة ليس كافياً لدخول اختبار الايلتس، فالتعود علي شكل الاختبار و طريقة الاسئلة و الحل، يحتاج تدريب خاص، فالاختبار يجري في توقيت زمني ضيق انت بتحارب اللغة و الوقت. انصح بشدة باستخدام الكتاب التالي: http://faculty.ksu.edu.sa/…/101%20Helpful%20Hints%20For%20I…
انا شخصياً اعتمدت عليه بشكل كلي و حصري، كتاب سهل و رائع بيعرفك كل حاجة عن الاختبار و شرح كل جزء من اجزائه بشكل رائع، و به مجموعة من الكلمات المفيدة جدا في الايلتس، بالاضافة الي بعض الاختبارات الكاملة مع الحل، يعني بتخلص الكتاب ده و بتحل كام امتحان و بتصحح لنفسك، و لما تلاقي نفسك جاهز، احجز الاختبار و توكل علي الله.
أخيراً: لو مشيت علي الخطوات دي ممكن تدخل الاختبار في خلال من 3 إلي 6 شهور فقط، بدون متدفع ولا مليم، و بطريقة اسرع بكتيييير، بس لازم يكون عندك حاجتين اساسيتين بدونهم مش هتعرف تنجز أي حاجة في حياتك و هما (الدافع و الإلتزام)، و صدقني الايلتس هيفرق معاك جداً في حياتك، و يستحق شوية تعب.
أرجو اني اكون افدتكم، و و تمنياتي لكم بالتوفيق.
عمر الأمين منقول من جروب Way2IELTSTOEFL 

هناك 43 تعليقًا:

  1. عايز حد كده يفرحني و يقولي إنه دخل الاختبار و جاب درجة كويسة ��

    ردحذف
    الردود
    1. رسوم اختبارات ايلتس وهى 1350 جنيه

      حذف
  2. والله موضوع حضرتك هو اللي شجعني وبقيت بذاكر وكل ما ايئس ادخل علي صفحت حضرتك بتوفيق للجميع يارب

    ردحذف
  3. انا جبت زيك بالظبط 6.5 و الreading هو اللي وقعني 5.5 و راحت عليا منحة كانت عايزة 7 بصراحة محبطة على النص درجة و مبسوطة اني من اول مرة جبت كدة و academic

    ردحذف
  4. متقلقيش طالما جبتي 6.5 من أول مرة يبقي سهل تجيبي 7 و ربنا يعوضك في منحة تانية

    ردحذف
  5. طيب حضرتك انا شغال في الأيتلس واختبارات من كتاب كامبريدج من 1:10 العشر كتب يعني في البداية من اول اختبار مستوايا لسن بيكون من 5 الي 6 والريندج من 4 الي 5 لس متدخلتش حل في الريتنج بس الأسبيكنج قوي تفتكر حضرتك محتاج اد ايه بالمستوي ده علشان اوصل لأسكور 7 الي 6ونص ككل ؟

    ردحذف
    الردود
    1. الكتب اللي معاك كفاية جداً، لانها عبارة عن امتحانات سابقة، و معاها الحل بتاعها، يعني لما تلاقي نفسك بتحل الامتحانات اللي معاك و بتجيب درجة كويسة يبقي ان شاء الله هتجيب درجة كويسة في الاختبار الفعلي،، تحياتي

      حذف
  6. طيب انا دلوقت ف تانيه جامعه من رأيك أخده دلوقت ولا استنى لما اخلص

    ردحذف
    الردود
    1. استني لما تخلص احسن، علشان الاختبار له مدة صلاحية سنتين

      حذف
  7. نجاحك في اﻻمتحان لفترة معينة و بعد كده بتحتاج تمتحن تاني ؟؟

    ردحذف
    الردود
    1. مدة صلاحية الاختبارات بعد سنتين

      حذف
  8. طب انا مستوايا فى الانجلش يعنى نوعا ما متوسط او اقل شويه
    ومحتار فى حاجه من اتنين ومش عارف اعمل ايه
    انا طالب فى 3 جامعه وناوى فى الاجازه ان شاء الله اقطع شوط كبير جدا فى اللغه بحيث انى عايز ايلتس بأسكور 7
    ومعايا كورس الاستاذ A J Hoge اسم الكورس effortless english تقريبا مشهور وكل الناس تعرفه وشرحه كويس جدا وبفهم منه بس المشكله ان هو امريكى والايلتس بريطانى
    ومعايا موقع BBC learn English موقع فظيع جدا وبفهم منه بشكل كويس جدا
    مش عارف بقى اشتغل على اى واحد منهم فى الاجازه بحيث ان هو يساعدنى فى الحصول على الايلتس ؟
    الرجاء نصيحه وقولى اعمل ايه علشان انا محتار جدا ومش عارف حتى اركز فى الامتحانات الايام دى بسبب كدا
    اسف جدا على الاطاله
    وشكرا جدا لحضرتك

    ردحذف
    الردود
    1. ممكن تبدأ بالكورس اللي معاك، و بعد كده تستعد للاختبار من الكتاب اللي انا حاطه في اخر البوست، و ربنا يوفقك

      حذف
  9. يا دكتور انا بذاكر الايلتس لوحدى حسب موضوع حضرتك بس عندى مشكلة فى معرفة النطق الصحيح للكلام الانجليزى الجديد عليا؟ و كمان من البداية ابدأ مرحلة ال listening و لا لأ؟؟؟...............و اسفه على الازعاج

    ردحذف
  10. بعد أذنك هل نفس الكلام ينطبق علي اختبار ال TOFEL؟؟ و ايه الفرق بينهم ؟

    ردحذف
    الردود
    1. انا جربت التوفل في البداية، و وجدته اكثر تعقيداً، و فرص الحصول علي درجة عالية قليلة، بينما الايلتس سهل انك تفهمي اسلوبه و طريقة حله بشكل أسرع، و في النهاية الاختباران لهما نفس القوة تماما، يعني لو مكان طالب توفل يبقي لازم يقبل ايلتس

      حذف
  11. Self learning is a key success almost at any thing �� .. ( 6.5/9 )That score was five years ago just right after high school and ever since I did not apply for another IELTS examination .. Just wondering what score would I achieve these days ��

    ردحذف
  12. طيب لو سمحت يا عمر راتب القاموس مش شغال يا ريت ترد عليا برابط للقاموس شغال وجزاك الله كل خير البوست فعلا مفيد ربنا يكرمك

    ردحذف
    الردود
    1. بس يفضل يكون النسخة مفيهاش عربي، يعني يبقي انجليزي بس، علشان كما ذكرت مسبقاً وجود العربي بيعمل خلط، اقصد ان وجود الكلمة بالانجليزي و الصورة التابعة لها كافي، و شكراً علي مجهودك

      حذف
  13. دكتور في الحقيقة انا بتبع ستراتيجيات القراءة لكن ما بقدر اكمل في الوقت المحدد وعلاغلب given, not given بحلها خطأ.ممكن تفيدني

    ردحذف
    الردود
    1. انت قريت الجزء بتاع الاعداد للقراءة اللي في الكتاب الاخير؟

      حذف
  14. Thanks my dearest, it's a useful information help me alot .... I'm following you from Iraq and I will do my exam at the end of this month

    ردحذف
  15. يعنى انا ممكن اقدم عالامتحان عالطول مش بيشترطوا انى امون واخد مستويات عندهم صح

    ردحذف
    الردود
    1. بالظبط، ممكن تحجز الامتحان مباشرة، و ده اللي انا عملته، تحياتي

      حذف
  16. أستاذ عُــمر الله يعطيك ألف ألف عافية على النصائح اللي كتبتها فوق
    حاب أقولك على تجربتي اذا ماعندك مانع:
    أنا حفظت ١٣ أغنية بالإنجليزي و أربع مقاطع فيديو أفلام وحسيت في بالسبيكينغ والليسينينغ عندي
    ولما اختبرت تحديد المستوى في البريتش كونسل جبت E4 وسجلت عندهم دورة بس ماكملت
    اش لازم اعمل بعد كده استمر بحفظ الأغاني والأفلام وإلا أبدا بتحضير الآيلتس؟

    شكراً جزيلاً

    ردحذف
  17. سلام عليكم يا عمر انا كنت عايؤة اعرف لو حد اعترض علي النتيجة و اخد درجات و فلوس في مصر؟لو تعرف حد عمل كلده يا رييت تقولي لاني جبت في الكتابه 6 برضه و انا شغلي اصلا بالانجليزي كلام و كتابه و مش مصدقة اني اخد 6 في الكتابه و 6ز5 في التحدث ده غير ان الهجرة اللي هقدم عليها محتاجه عالاقل 7ات في كل جزءزيا ريت تفيدني قبل ما اروح ادفع لفلوس

    ردحذف
    الردود
    1. مفيش استرداد للفلوس، و لكن في اعتراض علي النتيجة و ساعتها هيعيدو تصحيح الاختبار و لو ليكي درجات هتخديها

      حذف
  18. طب هل بتحتاج تجدد الاختبار كل فترة زي ما بيحصل في التويفل ولا بتاخد الشهادة وانتهي الموضوع علي كده ؟؟

    ردحذف
    الردود
    1. يجدد بعد سنتين من تاريخ الاختبار

      حذف
  19. بصراحة انا كبني ادم عايز اخد الايلتس عشان اهج محتاج كام ساعة في اليوم ياريت بدقة عشان اخلص في 3 شهور علما اني مفروض كويس في المحادثات

    ردحذف
  20. هي المادة اللي اذاكر منها كالها online ??
    و لا في حاجة لازم اشتريها ؟؟ و لو كده منين؟ ؟

    ردحذف
  21. كلها اونلاين أو اتصل على رقم مركز دراسات الاختبارات 01157488111
    بالتوفيق

    ردحذف
  22. ممكن سؤال لو سمحت. ايه الأماكن التانيه المعتمدة غير الجيزه اللي بيتعمل فيها الإختيار. يعني ايه هي المحافظات التانيه المعتمدة لذلك.

    ردحذف
  23. Cairo, Alexandria, Mansoura, Port Said (Canal area), Tanta and Luxor and you can call the Test Centers and Prep Centers in Egypt
    01157488111
    Good Luck :) :) :)

    ردحذف
  24. والله برافو عليك شكلك إنسان على خلق ودين ربنا يوفقك وادعيلى اقدر اعمل زيك انا اصلا تخصص English بس للأمانة نفسى اطور من نفسى بس مش عارفة

    ردحذف
  25. الف مبروك ومن نجاح الى نجاح ان شاء الله(y)
    كنت حابب اسئل .. هل الشهاده صالحه لحد تاريخ محدد ومتاج تمتحن تانى بعده ولا لأ هي مره واحده بس؟

    ردحذف
  26. لو سمحت انا سمعت ان الايلتس بيجيبو واحد يتكلم معاك محادثه. هل الكلام ده صح. ونظام الامتحان استماع وكتابه ولا في حاجه تانيه؟؟؟؟

    ردحذف
    الردود
    1. بالتأكيد في جزء المحادثة تقومين بالتحدث مع شخص لمدة ربع ساعة تقريباً، و اجزاء الاختبار هي الاستماع، القراءة، الكتابة و التحدث

      حذف
  27. In reading passages were you skim and scan or read the whole passages

    ردحذف
    الردود
    1. There is no enough time to read the whole passage, you have to skim and scan :)

      حذف
  28. هو نتيجة الامتحان لية صلاحية سنة او سنتينولا نتيجته معترف بيها على طوول

    ردحذف